వేచి చూసే ధోరణిలో జగన్

హైదరాబాద్: వైయస్ జగన్మోహన్ రెడ్డిని ముఖ్యమంత్రిని చేసే విషయంలో కొన్నాళ్లు వేచి చూద్దామని దివంగత నేత వైయస్ రాజశేఖర రెడ్డి ఆత్మీయ మిత్రుడు, రాజ్యసభ సభ్యుడు కెవిపి రామచందర్ రావు మంత్రులకు సూచించారు. తొందర పడితే లాభం లేదని కూడా ఆయన చెప్పినట్లు సమాచారం. మంగళవారం ఆయన తన వర్గానికి చెందిన మంత్రులతో సమావేశమయ్యారు. సమావేశానికి సంబంధించి కొత్త విషయాలేమీ లేవని ఆయన మీడియా ప్రతినిధులతో అన్నారు. తనకు తెలిసింది వారికి చెప్పానని, వారికి తెలిసింది తనకు వివరించుకున్నామని, అంతకు మించి విశేషాలేమీ లేవని ఆయన అన్నారు. అయితే ఏం చేయాలనే విషయంపై ఎటూ తేల్చుకోపోతున్నట్లు సమాచారం.

ముఖ్యమంత్రి పదవి జగన్ ఇస్తారా, లేదా అనేది కూడా తెలియడం లేదని, కాంగ్రెసు పార్టీ అధిష్ఠానవర్గం ఈ విషయంలో ఎటూ తేల్చి చెప్పడం లేదని ఆయన మంత్రులతో అన్నట్లు సమాచారం. అయితే వారం లోపే అధిష్ఠాన వర్గం నుంచి నిర్ణయం రావచ్చునని ఆయన మంత్రులకు చెప్పినట్లు సమాచారం. ఈ స్థితిలో ముందు నుయ్యి వెనక గొయ్యిలాగా కెవిపి వర్గీయుల పరిస్థితి తయారైంది. అధిష్ఠాన వర్గంపై మరింత ఒత్తిడి పెట్టే స్థితిలో కూడా వీరు లేరు. ఏమైనా చేయబోతే తెగే దాకా లాగినట్లవుతోందనే ఉద్దేశంతో ఉన్నట్లు తెలుస్తోంది.