కెసిఆర్ ది బానిస బుద్ధి: సిపిఐ

హైదరాబాద్: నిజాం నవాబును ప్రశంసించడంపై సిపిఐ రాష్ట్ర కార్యదర్శి కె.నారాయణ తెలంగాణ రాష్ట్ర సమితి (తెరాస) అధ్యక్షుడు కె.చంద్రశేఖర రావుపై ధ్వజమెత్తారు. బిజెపిపై కూడా ఆయన విరుచుకుపడ్డారు. నిజాం నవాబును ప్రశంసించిన కెసిఆర్ ది బానిసల్లో బానిస బుద్ధి అని ఆయన శుక్రవారం మీడియా ప్రతినిధుల సమావేశంలో అన్నారు. తెలంగాణ విముక్తి పోరాటానికి, కెసిఆర్ చేస్తున్న ప్రత్యేక పోరాటానికి మధ్య ఎలాంటి సంబంధం లేదని ఆయన అన్నారు.

తెలంగాణ సాయుధ పోరాటానికి కెసిఆర్ తనను ముడిపెట్టుకోవడం అత్త మీసాలకు మామ మోకాలికి ముడిపెట్టడం వంటిదని ఆయన వ్యాఖ్యానించారు. తెలంగాణ సాయుధ పోరాట కాలంనాటికి బిజెపి లంగోటా కట్టలేదని ఆయన వ్యాఖ్యానించారు. సాయుధ పోరాటానికి ఇప్పుడు మతం రంగు పులమటం ఆ పార్టీకే సిగ్గు చేటు అని ఆయన అన్నారు.