జగన్ పై ఇప్పుడే కాదు: సోనియా

న్యూఢిల్లీ: మూడు రాష్ట్రాల శాసనసభ ఎన్నికల తర్వాతనే ఆంధ్రప్రదేశ్ లో నాయకత్వ మార్పిడిపై ఆలోచన చేస్తామని సోనియా తమతో సూచన ప్రాయంగా చెప్పినట్లు పెద్దపల్లి కాంగ్రెసు పార్లమెంటు సభ్యుడు జి. వివేక్, రాష్ట్ర మాజీ మంత్రి జి.వినోద్ చెప్పారు. వీరిద్దరు గురువారంనాడు సోనియా గాంధీని కలిశారు. కాంగ్రెసు చాలా చరిత్ర ఉన్న పార్టీ అని, ఇక్కడ అన్ని విషయాలూ ఆలోచిస్తామని, తన కన్నా పార్టీయే ముఖ్యమని, కోర్ కమిటీలో ఆలోచించే అన్ని నిర్ణయాలూ తీసుకుంటామని సోనియా తమతో అన్నట్లు వారు మీడియా ప్రతినిధులతో చెప్పారు. వ్యక్తుల కన్నా పార్టీయే ముఖ్యమని సోనియా చెప్పినట్లు వారు తెలిపారు.

జగన్ గురించి సోనియా మంచి అభిప్రాయాన్ని వ్యక్తం చేసినట్లు వారు తెలిపారు. జగన్ యువకుడు, నియోజకవర్గంలో కూడా పనిచేశాడు, మంచి పత్రిక పెట్టాడు, అతనిలో సామార్థ్యాలున్నాయని సోనియా అన్నట్లు వారు తెలిపారు. వైయస్ రాజశేఖర రెడ్డి మంచి అనుభవజ్ఞుడైన రాజకీయ నాయకుడని, వైయస్ నుంచి పార్టీ ఎంతో లాభపడిందని, ఆయన కార్యక్రమాలు ప్రజలకు మేలు చేశాయని సోనియా అన్నట్లు వారు వివరించారు.