తేల్చుకుందాం రా: కెసిఆర్

హైదరాబాద్: తనపై, పార్టీపై విమర్శలు చేసిన తమ పార్టీ శాసనసభ్యుడు అరవింద్ రెడ్డిపై తెలంగాణ రాష్ట్ర సమితి (తెరాస) అధ్యక్షుడు కె.చంద్రశేఖర రావు తీవ్రంగా మండిపడ్డారు. ఈ నెల 18వ తేదీ సాయంత్రం ఆదిలాబాద్ జిల్లా మంచిర్యాలలో ప్రజాకోర్టు నిర్వహిస్తామని, దమ్ముంటే అక్కడికి వచ్చి మాట్లాడాలని ఆయన అరవింద్ రెడ్డిని సవాల్ చేశారు. గత కొంత కాలంగా స్తబ్దుగా ఉన్న తెరాస వ్యవహారాలు మంచిర్యాల పార్టీ శాసనసభ్యుడు అరవింద్ రెడ్డి అసమ్మతి గళంతో మళ్లీ వేడెక్కాయి. తెలంగాణకు అన్యాయం జరుగుతున్నా కెసిఆర్ నిమ్మకు నీరెత్తినట్లు వ్యవహరిస్తున్నారని ఆయన అన్నారు. తెరాస వల్ల తెలంగాణ రాదని ఆయన అన్నారు. తెరాస రాజకీయ పార్టీగా మాత్రమే ఉందని, ఉద్యమ పార్టీగా లేదని ఆయన అన్నారు. ఉద్యమాలు చేయకపోతే తెలంగాణ రాదని ఆయన అన్నారు.

ఇతర పార్టీలతో పొత్తు పెట్టుకుని కెసిఆర్ తెలంగాణకు అన్యాయం చేశారని ఆయన విమర్శించారు. ఇలాగే కొనసాగితే వచ్చే ఎన్నికల్లో పార్టీకి ఐదు సీట్లు కూడా రావని ఆయన అన్నారు. తాను పార్టీలో ఉంటానని, పార్టీలో ఉండే నాయకత్వంపై పోరాటం చేస్తానని ఆయన అన్నారు. తెరాస నాయకత్వం మారాల్సిందేనని ఆయన అభిప్రాయపడ్డారు.