కెసిఆర్ కు అరవింద్ సరెండర్

హైదరాబాద్: అసమ్మతి గళం విప్పిన ఆదిలాబాద్ జిల్లా మంచిర్యాల శాసనసభ్యుడు తెలంగాణ రాష్ట్ర సమితి (తెరాస) అధ్యక్షుడు కె.చంద్రశేఖర రావుకు సరెండరయ్యారు. కెసిఆర్ పై, పార్టీపై తీవ్ర వ్యాఖ్యలు చేసిన అరవింద రెడ్డి వెనక్కి తగ్గి క్షమాపణలు చెప్పారు. దీంతో తెరాసలో మొదలైన ముసలం సమసిపోయినట్లేనని భావిస్తున్నారు. అరవింద రెడ్డి విమర్శలపై తెరాస నాయకత్వం మంచిర్యాలలో ప్రజాకోర్టును తలపెట్టింది. అయితే అరవింద రెడ్డి క్షమాపణలు చెప్పడంతో దాన్ని పార్టీ నాయకత్వం రద్దు చేసుకుంది.

తనకు కెసిఆర్ నాయకత్వంపై నమ్మకం ఉందని, తెలంగాణ కెసిఆర్ నాయకత్వంలోనే వస్తుందని అరవింద రెడ్డి వెనక్కి తగ్గి ప్రకటించారు. ఆయన కెసిఆర్ ను కలిసి తన వ్యాఖ్యలపై వివరణ ఇవ్వడానికి కూడా సిద్దపడ్డారు. ఆదిలాబాద్ జిల్లా నాయకులతో కలిసి ఆయన కెసిఆర్ ను కలుస్తారు. పార్టీ శాసనసభా పక్ష నేత ఈటెల రాజేందర్ పై చేసిన వ్యాఖ్యలపై కూడా ఆయన కెసిఆర్ కు వివరణ ఇస్తారు.