ఉప ఎన్నికల్లో కాంగ్రెసు గాలి

హైదరాబాద్: స్థానిక సంస్థలకు జరిగిన ఉప ఎన్నికల్లో కాంగ్రెసు గాలి వీచింది. రాష్ట్రంలోని నగర పాలక, పురపాలక సంస్థల్లోని డివిజన్లకు, వార్డులకు జరిగిన ఉప ఎన్నికల ఓట్ల లెక్కింపు శనివారం జరిగింది. ఈ ఉప ఎన్నికల్లో కాంగ్రెసు మెజారిటీ స్థానాలను దక్కించుకుంది. కరీంనగర్ కార్పోరేషన్ లోని 14వ డివిజన్ కు జరిగిన ఉప ఎన్నికలో కాంగ్రెస్ అభ్యర్థి అశోక్ రావు విజయం సాధించారు. విజయవాడ 44వ వార్డులో కాంగ్రెసు అభ్యర్థి శ్రీనివాస్ గెలుపొందారు. అనంతపురం జిల్లాలోని రెండు స్థానాలను కూడా కాంగ్రెసు కైవసం చేసుకుంది. హిందూపురం 38వ వార్డులో కాంగ్రెసు అభ్యర్థి విజయం సాధించారు. అలాగే కదిరి మున్సిపాలిటీలోని ఒక స్థానంలో కూడా కాంగ్రెసు విజయం సాధించింది.

విజయనగరం జిల్లా పార్వతీపురం 11వ వార్డులో కాంగ్రెసు అభ్యర్థి తాటిపూడి అచ్చయ్య విజయం సాధించారు. ఎంపిటీసిలకు జరిగిన ఉప ఎన్నికల్లో రెండు స్థానాలను కూడా కాంగ్రెసు దక్కించుకుంది. వరంగల్ 37వ డివిజన్ ఎన్నికల్లో కూడా కాంగ్రెసు విజయం సాధించింది. కృష్ణా జిల్లా జగ్గయ్య పేట 15వ వార్డు ఎన్నికల్లో తెలుగుదేశం అభ్యర్థి శ్రీరామ్ సుబ్బారావు విజయం సాధించారు. పిఠాపురం 25వ వార్డులో ప్రజారాజ్యం అభ్యర్థి ఉమాదేవి విజయం సాధించారు.