దాడులు: ఫాస్ట్ ట్రాక్ కోర్టులు

హైదరాబాద్: రాష్ట్రంలో మహిళలపై, యువతులపై జరుగుతున్న దాడుల కేసుల విచారణకు జిల్లాల్లో ఫాస్ట్ ట్రాక్ కోర్టులు ఏర్పాటు చేయనున్నట్లు హోం మంత్రి సబితా ఇంద్రారెడ్డి చెప్పారు. మహిళలపై, యువతులపై దాడులు పెరుగుతున్న నేపథ్యంలో ఆమె శనివారం పోలీసు ఉన్నతాధికారులతో సమీక్ష నిర్వహించారు. మహిళలపై, యువతులపై దాడులు చేసినవారిపై నాన్ బెయిలబుల్ కేసులు పెట్టి అరెస్టు చేయాలని ఆమె పోలీసులను ఆదేశించారు. దాడులపై 509 సెక్షన్ కింద కేసులు నమోదు చేయాలని ఆమె ఆదేశించారు.

ప్రతి కళాశాలలోనూ విద్యార్థుల కోసం తప్పనిసరిగా కౌన్సెలింగ్ కేంద్రాలను ఏర్పాటు చేయానలి ఆమె అధికారులకు సూచించారు. తప్పని సరిగా కళాశాలల్లో ఒక రోజు ఎస్పీ స్థాయి అధికారి గ్రీవెన్స్ సెల్ ఏర్పాటు చేయాలని కూడా ఆమె సూచించారు. ప్రతి జిల్లా ఎస్పీ కార్యాలయంలో మహిళల ఫిర్యాదుల స్వీకరణకు పది రోజుల్లోగా గ్రీవెన్స్ సెల్ ఏర్పాటు చేస్తామని సబిత చెప్పారు.