మోడీకి నోటీసు ఇవ్వం: నానావతి

అహ్మదాబాద్: గోద్రా సంఘటన అనంతర అల్లర్ల కేసులో తన ముందు హాజరు కావాలని గుజరాత్ ముఖ్యమంత్రి నరేంద్ర మోడీకి నోటీసు ఇవ్వడానికి నానావతి కమిషన్ నిరాకరించింది. 2202లో జరిగిన గోద్రా రైలు మారణకాండపై, తదనంతర అల్లర్లపై నానావతి, మెహతాలతో కూడిన ద్విసభ్య కమిషన్ విచారిస్తోంది. ముఖ్యమంత్రి కార్యాలయ సిబ్బంది, మంత్రుల టెలిఫోన్ సంభాషణల వివరాలు అందించాలని మాత్రం కమిషన్ ఆదేశించింది. గోద్రా అల్లర్లలకు సంబంధించి జరిగిన సంభాషణలు పలువురి పాత్రను వెల్లడిస్తాయని అంటూ నరేంద్ర మోడీకి సమన్లు జారీ చేయాలని జన సంఘర్షణ మోర్చా కమిషన్ ను కోరింది.

మోడికి నోటీసు జారీ చేయడానికి నిరాకరించడం ద్వారా నానావతి కమిషన్ కు విశ్వసనీయత లేకుండా పోయిందని సామాజిక కార్యకర్త టీస్టా సేతల్వాద్ విమర్శించారు. మంత్రులు, అధికారులు అఫిడవిట్లు దాఖలు చేయాలని నానావతి కమిషన్ ఆదేశించింది. ముఖ్యమంత్రిని ప్రశ్నించడానికి కమిషన్ నిరాకరించడం దురదృష్టకరమని అన్నారు.