జగన్ కు వ్యతిరేకం కాదు: రేణుక

హైదరాబాద్: దివంగత ముఖ్యమంత్రి డాక్టర్ వైయస్ రాజశేఖర రెడ్డి తనయుడు వైయస్ జగన్ కు తాను వ్యతిరేకిని కానని కేంద్ర మాజీ మంత్రి, కాంగ్రెసు నాయకురాలు రేణుకా చౌదరి స్పష్టం చేశారు. ఆమె ఒక తెలుగు టీవీ చానెల్ ఢిల్లీ ప్రతినిధితో శనివారం ప్రత్యేకంగా మాట్లాడారు. తాను జగన్ కు వ్యతిరేకంగా మాట్లాడలేదని ఆమె స్పష్టం చేశారు. జగన్ ను ముఖ్యమంత్రిని చేయాలనే అంశంపై పార్టీ అధిష్ఠాన వర్గం త్వరలోనే నిర్ణయం తీసుకుంటుందని ఆమె అభిప్రాయపడ్డారు.

జగన్ కు మంచి భవిష్యత్తు ఉందని, కొంత మంది జగన్ భవిష్యత్తును దెబ్బ తీసే ప్రయత్నం చేస్తున్నారని, అదే విషయాన్ని తాను చెప్పానని ఆమె అన్నారు. జగన్ భవిష్యత్తును చెడగొట్టవద్దనే ఉద్దేశంతో తాను ఆ మాట అన్నానని, జగన్ తన కొడుకులాంటివాడని, అందుకే ఆ మాట చెప్పానని ఆమె అన్నారు. తాను పార్టీ అధిష్ఠానవర్గానికి సన్నిహితురాలిని ఏమీ కాదని, తాను క్రమశిక్షణ గల ఒక కార్యకర్తను మాత్రమేనని ఆమె అన్నారు.