రాజకీయ ట్రస్టు మాదే: బాబు

హైదరాబాద్: సేవా కార్యక్రమాలు నిర్వహించడానికి ట్రస్టు ఏర్పాటు చేసిన రాజకీయ పార్టీ తమది ఒక్కటేనని తెలుగుదేశం పార్టీ అధ్యక్షుడు నారా చంద్రబాబు నాయుడు అన్నారు. ఎన్టీఆర్ ట్రస్టు తరఫున ఆయన ఆదివారం పేద విద్యార్థులకు ఆర్థిక సహాయం అందించారు. పార్టీ కార్యాలయం ఎన్టీఆర్ ట్రస్టు భవన్ లో జరిగిన కార్యక్రమంలో ఆయన ప్రసంగించారు. పేద విద్యార్థులకు ఆర్థిక సహాయం అందించాల్సిన అవసరం ఉందని ఆయన అన్నారు.

విద్యాజ్యోతి ట్రస్టు పేద విద్యార్థుల కోసం ఎంతో సహాయం చేస్తోందని ఆయన అన్నారు. డబ్బులు సంపాదించే విషయంలో ఎంతగా ఆరాటపడుతామో వాటిని సద్వినియోగం చేసినప్పుడు అంత సంతృప్తి కలుగుతుందని ఆయన అన్నారు. పేదలకు మేలు చేసేందుకు తాము అన్ని విధాలా కృషి చేస్తున్నట్లు ఆయన తెలిపారు.