యువరాజ్యం పవన్ కళ్యాణ్ దే

హైదరాబాద్: పార్టీ అనుబంధ సంస్థ యువరాజ్యం బాధ్యతలను సినీ నటుడు, పార్టీ అధ్యక్షుడు చిరంజీవి సోదరుడు పవన్ కళ్యాణ్ కే అప్పగించాలని ప్రజారాజ్యం నాయకత్వం నిర్ణయించినట్లు తెలుస్తోంది. అయితే హోదాలో మాత్రం స్వల్ప మార్పులు ఉండవచ్చు. ఆయనను అధ్యక్షుడిగా కాకుండా యువరాజ్యం గౌరవాధ్యక్షుడిగా నియమించే అవకాశాలున్నాయి. పవన్ కళ్యాణ్ ప్రస్తుతం సినిమా షూటింగులో బిజీగా ఉన్నారు. దాంతో పార్టీ కార్యకలాపాల కోసం సమయం కేటాయించలేకపోతున్నారు. పవన్ కళ్యాణ్ కూడా ఇటీవల ఇదే విషయం చెప్పారు.

యువరాజ్యం సంస్థాగత వ్యవహారాలను చూడడానికి చురుకైన యువనేతను యువరాజ్యం అధ్యక్షుడిగా నియమించే అవకాశాలున్నాయి. పవన్ కళ్యాణ్ కు అనుకూలమైన యువ నేతను అధ్యక్షుడిగా నియమించే అవకాశం ఉంది. పవన్ కళ్యాణ్ మాత్రం యువతను పార్టీ వైపు ఆకర్షించడానికి సమావేశాలు, సభలు తదితర కార్యక్రమాల్లో పాల్గొంటారు. యువరాజ్యానికి పవన్ కళ్యాణ్ నాయకత్వం లేకపోతే పార్టీకి యువత మద్దతు తగ్గుతుందనే అనుమానం నాయకత్వానికి ఉంది. దీంతో యువత సారథ్య బాధ్యతలు మాత్రం పవన్ కే ఉంటాయని అంటున్నారు. కాగా, మహిళా రాజ్యాన్ని పునర్వ్యస్థీకరిస్తామని చిరంజీవి చెప్పారు. మహిళారాజ్యం అధ్యక్షురాలు శోభారాణి ఇటీవలి కాలంలో వివాదాస్పదంగా మారారు. దీంతో ఆమెను మార్చే అవకాశాలున్నట్లు చెబుతున్నారు.