చిరు పనికి రారు: రాఘవేంద్ర

నెల్లూరు: ప్రజారాజ్యం పార్టీ అధినేత చిరంజీవి రాజకీయాలకు పనికి రారని ఆ పార్టీ ఎమ్మెల్సీ బొమ్మిరెడ్డి రాఘవేంద్ర రెడ్డి వ్యాఖ్యానించారు. ఆయన ప్రజారాజ్యం పార్టీకి రాజీనామా చేశారు. అంతటితో సరిపుచ్చకుండా చిరంజీవిపై తీవ్ర వ్యాఖ్యలు చేశారు. చిరంజీవి సినిమాల్లో హీరోనే గాని రాజకీయాలకు పనికి రారని ఆయన అన్నారు. ఆయన ఆదివారం రాత్రి పార్టీకి రాజీనామా చేశారు.

వరుస పరాజయాలను బట్టి ప్రజారాజ్యం పార్టీకి భవిష్యత్తు లేదని తేలిపోయిందని ఆయన వ్యాఖ్యానించారు. వ్యక్తిగతంగా చిరంజీవి మంచివారే గాని రాజకీయాలకు పనికి రారని అన్నారు. చిరంజీవి వైయస్ జగన్మోహన్ రెడ్డిని కలిసి ప్రజారాజ్యం పార్టీని కాంగ్రెసులో విలీనం చేయాలని కూడా ఆయన సూచించారు. ప్రజారాజ్యం పార్టీని కాంగ్రెసులో విలీనం చేస్తేనే రాజకీయ భవిష్యత్తు ఉంటుందని ఆయన అన్నారు.