రోశయ్య చాలా కాలమే

హైదరాబాద్: ముఖ్యమంత్రిగా కె.రోశయ్యను చాలా కాలమే కొనసాగించడానికి కాంగ్రెసు పార్టీ అధిష్ఠాన వర్గం నిర్ణయించినట్లు తెలుస్తోంది. ఆదివారం చకచకా జరిగిన పరిణామాలు ఈ విషయాన్ని స్పష్టం చేస్తున్నాయి. అంతేకాకుండా రోశయ్య ఒక ప్రైవేట్ తెలుగు టీవీ చానెల్ ప్రత్యేక కార్యక్రమంలో మాట్లాడిన తీరు బట్టి ఆ విషయం అర్థమవుతోంది. పార్టీ సీనియర్ నాయకుడు కె. కేశవరావు రోశయ్యను కలిసి అధిష్ఠాన వర్గం సందేశాన్ని అందించినట్లు తెలుస్తోంది. రోశయ్యను కలిసిన తర్వాత కేశవరావు ఇచ్చిన కితాబు దాన్నే స్పష్టం చేస్తోంది. రోశయ్య ప్రభుత్వం సమర్థంగా పనిచేస్తోందని ఆయన ప్రశంసించారు.

రోశయ్యను మహారాష్ట్ర, అరుణాచల్ ప్రదేశ్, హర్యానా శాసనసభ ఎన్నికలు పూర్తయ్యే వరకు కొనసాగించడం ఖాయమనేది తేలిపోయింది. అంతేకాకుండా పూర్తి కాలం ఆయనను ముఖ్యమంత్రిగా కొనసాగించే అవకాశాలు కూడా లేకపోలేదని అంటున్నారు. రోశయ్య మంచి రోజు చూసుకుని సి - బ్లాకులోని ముఖ్యమంత్రి కార్యాలయానికి మారడానికి సిద్ధపడ్డారు. తాను ఎంత కాలం కొనసాగుతానో తెలియని అనిశ్చిత స్థితి వల్ల, జగన్ వర్గం మనోభావాలను దెబ్బ తీయడం ఇష్టం లేక ఆయన ఇప్పటి వరకు ముఖ్యమంత్రి కార్యాలయం నుంచి పనిచేయలేదని చెబుతున్నారు. ఇప్పుడు ఆ అడ్డంకులు తొలగిపోయినట్లు భావించడంతో అందుకు సిద్దఫడినట్లు సమాచారం.