సిఎం అభ్యర్థిపై కాకా వ్యాఖ్య

హైదరాబాద్: ముఖ్యమంత్రి అభ్యర్థిగా పార్టీ అధిష్ఠాన వర్గం ఎవరిని నిర్ణయించినా దానికి కట్టుబడి ఉంటానని కాంగ్రెసు సీనియర్ నేత జి.వెంకటస్వామి (కాకా) చెప్పారు. ఆయనను మంగళవారం మరో సీనియర్ నేత కె.కేశవరావు కలిశారు. ఈ సందర్భంగా వెంకటస్వామి మీడియా ప్రతినిధులతో మాట్లాడారు. ముఖ్యమంత్రి అభ్యర్థి విషయంలో పార్టీ అధిష్ఠాన వర్గానిదే తుది నిర్ణయమని ఆయన అన్నారు. ఈ విషయంలో తనదీ, కేశవరావుది ఒక్కటే అభిప్రాయమని ఆయన చెప్పారు. మూడు రాష్ట్రాల శాసనసభల ఎన్నికలు ముగిసిన తర్వాతనే రాష్ట్ర ముఖ్యమంత్రి ఎంపికపై పార్టీ అధిష్ఠాన వర్గం దృష్టి పెడుతుందని ఆయన అన్నారు.

వైయస్ రాజశేఖర రెడ్డి మరణానంతర పరిణామాలపై తాను మాట్లాడితే పెద్ద వార్తే అవుతుందని, సంతాప దినాలు కూడా ముగియక ముందే కొందరు నేతలు వ్యవహరించిన తీరు దారుణంగా ఉందని ఆయన అన్నారు. ముఖ్యమంత్రిగా రోశయ్య పని తీరు వండర్ ఫుల్ అని ఆయన అభిప్రాయపడ్డారు. రోశయ్య ఎంత కాలం ముఖ్యమంత్రిగా ఉంటే అంత కాలం బాగా పనిచేస్తారని ఆయన అన్నారు.