కెసిఆర్ ద్రోహాన్ని తేలుస్తా: అరవింద్

మంచిర్యాల: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు చేసిన ద్రోహాన్ని ప్రజాకోర్టులో బయట పెడతానని పార్టీ నుంచి సస్పండ్ అయిన ఆదిలాబాద్ జిల్లా మంచిర్యాల శాసనసభ్యుడు అరవింద్ రెడ్డి అన్నారు. అరవింద్ రెడ్డి ద్రోహాన్ని తేల్చేందుకు తెరాస మంచిర్యాలలో ప్రజాకోర్టు తలపెట్టింది. అయితే దానికి పోలీసులు అనుమతి ఇవ్వలేదు. ప్రజాకోర్టుకు పోలీసులు అనుమతి ఇవ్వలేదని, దానివల్ల కెసిఆర్ తెలంగాణకు చేసిన ద్రోహాన్ని బయటపెట్టే మంచి అవకాశం చేజారి పోయిందని ఆయన బుధవారం మీడియా ప్రతినిధులతో అన్నారు.

తెరాస ప్రజాకోర్టు పెడితే తెలంగాణలోని పది జిల్లాల నుంచి కెసిఆర్ బాధితులు తరలి వస్తారని, వారు కెసిఆర్ ద్రోహాన్ని బయట పెడతారని ఆయన అన్నారు. తన అభిప్రాయాలను కూడా లేఖ రూపంలో తన అనుచరుల ద్వారా ప్రజాకోర్టుకు పంపుతానని ఆయన అన్నారు. తాను తెరాస వల్ల గెలవలేదని, తన సొంత బలంతోనే శాసనసభ్యుడిగా గెలిచానని ఆయన అన్నారు. కాగా, తెరాస ప్రజాకోర్టు తలపెట్టడంతో మంచిర్యాలలో తీవ్ర ఉద్రిక్తత నెలకొంది. తెరాస నాయకులు బస చేసిన లాడ్జీని పోలీసులు తనిఖీ చేశారు.