జగన్ ను సిఎం చేయండి: రాజశేఖర్

కడప: దివంగత నేత వైయస్ రాజశేఖర్ రెడ్డి తనయుడు వైయస్ జగన్ ను ముఖ్యమంత్రిని చేయాలని సినీ నటుడు రాజశేఖర్, జీవిత దంపతులు కాంగ్రెసు పార్టీ అధిష్టాన వర్గాన్ని మరోసారి కోరారు. వారు గురువారం కడప జిల్లా ఇడుపులపాయ సందర్శించి రాజశేఖర రెడ్డి సమాధిని సందర్శించి నివాళులర్పించారు. వైయస్ రాజశేఖర రెడ్డి ఆశయాలు నెరవేరాలంటే జగన్ కు ముఖ్యమంత్రి పదవి ఇవ్వాలని వారు అభిప్రాయపడ్డారు.

జగన్ ను ముఖ్యమంత్రిని చేయాలనేది తమ అభిప్రాయం మాత్రమే కాదని, కోట్లాది ప్రజల హృదయ ఘోష అని వారన్నారు. ఈ విషయంలో పార్టీ అధిష్ఠానం ఎందుకు జాప్యం చేస్తుందో అర్థం కావడం లేదని జీవిత అన్నారు. ప్రజల మనోభావాలను గుర్తించి త్వరగా నిర్ణయం తీసుకోవాలని ఆమె పార్టీ అధిష్ఠానాన్ని కోరారు. జగన్ ను ముఖ్యమంత్రిని చేయాలని వారు ఇంతకు ముందు కూడా పార్టీ అధిష్ఠానాన్ని కోరారు. ఈ మేరకు వారు ఓ లేఖ కూడా రాశారు.