ఆ వ్యాఖ్యలతో జగన్ కు చేటు: టిజి

కర్నూలు: తమ పార్టీ ప్రధాన కార్యదర్శి అంబటి రాంబాబు వ్యాఖ్యలతో దివంగత నేత వైయస్ రాజశేఖర రెడ్డి తనయుడు వైయస్ జగన్ కు మంచి కన్నా చెడే ఎక్కువగా జరుగుతుందని కాంగ్రెసు శాసనసభ్యుడు టిజి వెంకటేష్ అన్నారు. ఆయన గురువారం మీడియా ప్రతినిధులతో మాట్లాడారు. జగన్ తో, రాజ్యసభ సభ్యుడు కెవిపి రామచందర్ రావు సలహాలు తీసుకునే రాంబాబు మాట్లాడారా అని ఆయన ప్రశ్నించారు. పరిపాలనకు వయస్సుతో నిమిత్తం లేదని, అది మెదడుతో పని ఆయన అన్నారు. ముఖ్యమంత్రిగా కె. రోశయ్య బలహీనుడైతే ప్రధానిగా మన్మోహన్ సింగ్ కూడా బలహీనుడేనని ఆయన వ్యాఖ్యానించారు.

ముఖ్యమంత్రి వ్యవహారంపై ఎవరూ మాట్లాడవద్దని, ముఖ్యమంత్రి వ్యవహారంపై అధిష్టాన వర్గం నిర్ణయం తీసుకుంటుందని కాంగ్రెసు సీనియర్ నేత కె. కేశవరావు అన్నారు. దీనిపై అంబటి రాంబాబు కేశవరావుపై తీవ్రంగా మండిపడ్డారు. అధిష్ఠాన వర్గానికి సంబంధించిన ఆదేశాలు కేశవరావుకు వర్తించవా అని అంబటి రాంబాబు ప్రశ్నించారు.