డిఎస్ టెలీ కాన్ఫరెన్స్ రసాభాస

హైదరాబాద్: సభ్యత్వ నమోదుపై ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ టెలీ కాన్ఫరెన్స్ శుక్రవారం రసాభాసగా మారింది. వైయస్ జగన్ ను ముఖ్యమంత్రిని చేసేంత వరకు సభ్యత్వ నమోదు కార్యక్రమం చేపట్టకూడదంటూ డిఎస్ టెలీ కాన్ఫరెన్స్ కు కాంగ్రెసు కార్యకర్తలు అడ్డు తగులుతున్న విషయం తెలిసిందే. శుక్రవారం ఐదు జిల్లాల నేతలతో ఆయన నిర్వహించిన టెలీ కాన్ఫరెన్స్ లకు కూడా అదే గతి పట్టింది. వైయస్ జగన్ ను ముఖ్యమంత్రిని చేయాలని కోరుతూ తూర్పు గోదావరి జిల్లా కాకినాడలో పార్టీ కార్యాలయానికి కార్యకర్తలు తాళం వేశారు.

ఖమ్మం జిల్లాలోనూ అదే పరిస్థితి ఎదురైంది. జగన్ ను ముఖ్యమంత్రిని చేయకపోతే మంత్రులు, శాసనసభ్యులు, ఎమ్మెల్సీలు రాజీనామా చేయాలని కార్యకర్తలు పెద్ద పెట్టున నినాదాలు చేశారు. జగన్ ను ముఖ్యమంత్రిని చేయకపోతే తాము ప్రజల్లోకి వెళ్లలేమని వరంగల్, నెల్లూరు జిల్లాల టెలీ కాన్ఫరెన్స్ల్ లో నేతలు డిఎస్ తో చెప్పారు. సభ్యత్వ నమోదు కార్యక్రమం చేపట్టలేమని వారు తెగేసి చెప్పారు.