జగన్ వర్గానికి హర్షకుమార్ హెచ్చరిక

రాజమండ్రి: దివంగత ముఖ్యమంత్రి వైయస్ రాజశేఖర రెడ్డి తనయుడు వైయస్ జగన్ మద్దతుదారులపై అమలాపురం కాంగ్రెసు పార్లమెంటు సభ్యుడు హర్షకుమార్ తీవ్రంగా మండిపడ్డారు. జగన్ ముఖ్యమంత్రి అభ్యర్థిత్వం కోసం ఆయన అనుచరవర్గం పార్టీ అధిష్ఠానాన్ని బ్లాక్ మెయిల్ చేస్తోందని హర్షకుమార్ శుక్రవారం మీడియా ప్రతినిధులతో అన్నారు. జగన్ ను ముఖ్యమంత్రిని చేయకపోతే త్యాగాలు చేస్తామన్నవారు ముందు రాజీనామా చేయాలని ఆయన సవాల్ చేశారు. అధికార పీఠాలకు దూరమవుతామనే భయంతో జగన్ ను ముఖ్యమంత్రిని చేయాలని డిమాండ్ చేస్తున్నారని ఆయన వ్యాఖ్యానించారు.

జగన్ మద్దతుదారులు బ్లాక్ మెయిలింగ్ కు పాల్పడుతున్నారని ఆయన ఆరోపించారు. కాంగ్రెసులో అనుభవంతోనే పదవులు వస్తాయని గుర్తించాలని ఆయన అన్నారు. బెదిరింపులు మాని పార్టీ అధిష్ఠాన వర్గం నిర్ణయాన్ని గౌరవించాలని ఆయన జగన్ మద్దతుదారులను డిమాండ్ చేశారు. జగన్ ను ముఖ్యమంత్రిని చేయకపోతే మనుగడ ఉండదని అంటున్నవారు రాజీనామాలు చేసి తిరిగి గెలవాలని ఆయన సవాల్ చేశారు.