అస్ట్ర్లేలియాలో ఇండియన్ పై దాడి

మెల్బోర్న్: ఆస్ట్రేలియాలో భారతీయులపై దాడులు ఆగడం లేదు. తాజాగా భారత టాక్సీ డ్రైవర్ పై ఆస్ట్రేలియా ఫుట్ బాల్ క్రీడాకారుడు దాడి చేశాడు. ఎస్సెండెన్ ఫుట్ బాల్ క్రీడాకారుడు మైఖెల్ హర్లీ హాడిల్ స్ట్రీట్ లోని ఫాస్ట్ ఫుడ్ ఔట్ లెట్ వద్ద భారత టాక్సీ డ్రైవర్ పై దాడి చేశాడు. దీంతో హర్లీని పోలీసులు అరెస్టు చేశారు. హర్లీ ఉదయం ఐదున్నర గంటలకు నైట్ క్లబ్ కు టాక్సీ తీసుకున్నాడు. ఆ తర్వాత ఫుడ్ అవుట్ లెట్ కు వెళ్లాడు. అతను ఆహారం కోసం టాక్సీ దిగాడు. దీంతో టాక్సీ డ్రైవర్ కిరాయి అడిగాడు. దీంతో హర్లీ ఆ టాక్సీ డ్రైవర్ పై దాడి చేశాడు.

హర్లీని సంఘటనా స్థలంలోనే పోలీసులు అరెస్టు చేశారు. విచారణ నిమిత్తం ఫిజ్రోయ్ పోలీసు స్టేషన్ కు తీసికెళ్లారు. ఆ తర్వాత అతన్ని పోలీసులు విడుదల చేశారు. హర్లీపై కేసు నమోదు చేయవచ్చునని వార్తా కథనాలు వెలువడ్డాయి. ఈ వార్తను రాసిన పత్రిక టాక్సీ డ్రైవర్ ను గుర్తించలేదు. అతనికి స్వల్ప గాయాలైనట్లు తెలిపింది. మైఖెల్ ఆలస్యంగా రావడం, తనను తాను ఇబ్బందుల్లో కూరుకుపోవడం అసంతృప్తికి గురి చేసిందని ఎస్సెండెన్ మేనేజింగ్ డైరెక్టర్ పీటర్ జాక్సన్ వ్యాఖ్యానించారు.