ఓటరు కార్డులకు సచిన్, ఐష్

ముంబై: మహారాష్ట్రలో ఎన్నిక జ్వరం వేడి పెరుగుతుండగా క్రికెటర్ సచిన్ టెండూల్కర్, బాలీవుడ్ నటి ఐశ్వర్యారాయ్ వంటి ప్రముఖులు ఓటరు గుర్తింపు కార్డుల కోసం ఆన్ లైనులో దరఖాస్తులు చేసుకుంటున్నారు. బాలీవుడ్ నటుడు అక్షయ్ కుమార్, ఆయన భార్య ట్వింకిల్ ఖన్నా, నటి సోనం కపూర్, ఆమె తండ్రి అనిల్ కపూర్, బాలీవుడ్ నటీమణులు నేహా ధుపియా, ప్రీతి జింటా, కిమ్ శర్మ ఓటరు గుర్తింపు కార్డుల కోసం దరఖాస్తులు పంపుకున్నారు.

ఓటరు ఐడి కార్డు కోసం సచిన్ దరఖాస్తు చేసుకున్నారని, సచిన్ పేరు ఓటర్ల జాబితాలో ఉందని, త్వరలోనే కార్డు సిద్ధం చేశామని జిల్లా డిప్యూటీ కలెక్టర్, డిప్యూటి ఎన్నికల అధికారి సంజయ్ భగవత్ చెప్పారు. సచిన్ మేనేజర్ గురువారంనాడే కార్డును తీసుకున్నారని ఆయన చెప్పారు. ఐశ్వర్యారాయ్ తన జన్మతేదీని ఇవ్వలేదని, ఆమె కార్డు కూడా తయారవుతుందని ఆయన చెప్పారు. అక్షయ్ కుమార్ పేరు ఓటర్ల జాబితాలో లేదు. దాంతో ఆయన అందుకు దరఖాస్తు చేసుకున్నారు. సోనమ్ కపూర్, అనిల్ కపూర్, ప్రీతి జింటాలకు ఓటరు గుర్తింపు కార్డులు జారీ చేసినట్లు భగవత్ చెప్పారు.