'మహా' పోటీకి కళావతి దూరం

నాగపూర్: మాహారాష్ట్ర శాసనసభ ఎన్నికల్లో రాహుల్ గాంధీ కళావతి పోటీ నుంచి తప్పుకుంది. ఆమె అభ్యర్థిత్వాన్ని బలపరిచిన ప్రభుత్వేతర సంస్థ విదర్భం జనాందోళన్ సమితి ఆమె స్థానంలో మరో మహిళ బేబీతాయిని వాని నియోజకవర్గంలో పోటీకి దించాలని నిర్ణయించింది. కళావతి ఆరోగ్యం బాగా లేదని, అదే సమయంలో పోటీ నుంచి తప్పుకోవాలని ఆమెపై అన్ని వైపుల నుంచి ఒత్తిడి వస్తోందని, దీంతో ఆమె స్థానంలో బేబీతాయిని పోటీకి దించుతున్నామని సమితి అధ్యక్షుడు కిశోర్ తివారీ శనివారం మీడియా ప్రతినిధుల సమావేశంలో చెప్పారు.

బేబీతాయి భర్త ఛతర్ సింగ్ 2007లో ఆత్మహత్య చేసుకున్నాడు. రాహుల్ గాంధీ పార్లమెంటులో ప్రస్తావించడంతో కళావతి వెలుగులోకి వచ్చింది. ఆమె శనివారం అనారోగ్యంతో అస్పత్రి పాలైంది. అయినా అంబులెన్స్ లో తీసుకొచ్చి ఆమె చేత సమితి నామినేషన్ వేయించింది. ఆమె ఇంతకు ముందు పోటీకి అయిష్టతను వ్యక్తం చేసింది. ప్రస్తుత మార్పుపై మాట్లడడానికి కళావతి అందుబాటులో లేదు.