సిఎల్పీ సమావేశం అక్కర్లేదు: బొత్సా

విజయనగరం/వరంగల్: నేతను ఎన్నుకోవడానికి కాంగ్రెసు లెజిస్లేచర్ పార్టీ (సిఎల్పీ) సమావేశం అంత ముఖ్యం కాదని రాష్ట్ర పంచాయతీరాజ్ మంత్రి బొత్సా సత్యనారాయణ అన్నారు. తాత్కాలిక ముఖ్యమంత్రి అని, తాత్కాలిక మంత్రులు అని రాజ్యాంగంలో ఎక్కడా లేదని ఆయన మంగళవారం మీడియా ప్రతినిధులతో అన్నారు. వైయస్ జగన్ ముఖ్యమంత్రి కావాలనేది తమ కోరిక అని ఆయన చెప్పారు. సిఎల్పీ నేత ఎంపిక విషయంలో తాము తమ కాంగ్రెసు పార్టీ ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ వ్యాఖ్యలకు తాము కట్టుబడి ఉన్నామని ఆయన చెప్పారు.

ముఖ్యమంత్రిని కాంగ్రెసు చరిత్రలో సిఎల్పీ ఏ రోజు కూడా ఎన్నుకోలేదని కాంగ్రెసు శాసనసభ్యుడు గండ్ర వెంకట రమణారెడ్డి మంగళవారం వరంగల్ అన్నారు. పార్టీ అధిష్టానం ఆదేశం మేరకే సిఎల్పీ నేతను ఎన్నుకుంటున్నామని ఆయన మీడియా ప్రతినిధులతో చెప్పారు. దివంగత ముఖ్యమంత్రి వైయస్ రాజశేఖర రెడ్డిని కూడా అధిష్టానం ఆదేశాల మేరకే ఎన్నుకున్నామని ఆయన చెప్పారు.