బాబుకు సీతా దయాకర్ షాక్

హైదరాబాద్: తెలుగు మహిళ అధ్యక్షురాలిగా నియమితులైన శాసనసభ్యురాలు సీతా దయాకర్ రెడ్డి తెలుగుదేశం పార్టీ అధ్యక్షుడు నారా చంద్రబాబునాయుడికి షాక్ ఇచ్చారు. ఆమె మంగళవారం చంద్రబాబుతో సమావేశమయ్యారు. తాను తెలుగు మహిళ అధ్యక్ష పదవిని చేపట్టబోనని ఆమె చంద్రబాబుతో చెప్పినట్లు సమాచారం. తాను ప్రస్తుతం నియోజక వర్గం సమస్యలపై దృష్టి సారించాల్సి ఉందని, అందువల్ల ఏడాది పాటు తెలుగు మహిళ అధ్యక్ష పదవిని చేపట్టబోనని, ఆ తర్వాత ఆలోచిస్తానని ఆమె చంద్రబాబుతో వివరించినట్లు సమాచారం.

తెలుగు మహిళ అధ్యక్ష పదవిని నిర్వహించిన వారెవరూ ఎక్కువ కాలం పార్టీలో కొనసాగరనే సెంటిమెంట్ తెలుగుదేశం పార్టీలో పెద్ద సమస్యగా మారినట్లు భావిస్తున్నారు. తెలుగు మహిళగా పని చేసిన శారద, జయప్రద, రోజా పార్టీ నుంచి తప్పుకోవాల్సి వచ్చింది. దీంతో ఆ పదవిని చేపట్టేందుకు సీతా దయాకర్ రెడ్డి సిద్ధంగా లేరని చెబుతున్నారు. కాగా, ఆ పదవిపై ఆశ పెట్టుకున్న కవిత అసమ్మతి గళం వినిపిస్తున్నారు.