వెనక్కి తగ్గని జగన్ వర్గీయులు

హైదరాబాద్: వైయస్ జగన్ ను ముఖ్యమంత్రిని చేయాలనే డిమాండ్ విషయంలో ఆయన వర్గీయులు వెనక్కి తగ్గే సూచనలు కనిపించడం లేదు. జగన్ ను ముఖ్యమంత్రిని చేయాల్సిందేనని వారు పట్టుబడుతున్నారు. మహిళా సంక్షేమ మంత్రి కొండ సురేఖ జగన్ ను ముఖ్యమంత్రిని చేయాల్సిందేనని ఆమె పట్టుబడుతోంది. రోశయ్య పూర్తి స్థాయి ముఖ్యమంత్రి కాదని ఆమె అంటున్నారు. కాంగ్రెస్ లెజిస్లేచర్ పార్టీ (సిఎల్పీ) ఎన్నుకుంటేనే పూర్తి స్థాయి ముఖ్యమంత్రి అవుతారని ఆమె అంటున్నారు. అధిష్టానం ఆదేశిస్తే ముఖ్యమంత్రిగా రోశయ్యను బలపరుస్తానని, అయితే వెంటనే తాను మంత్రి పదవికి రాజీనామా చేస్తానని ఆమె కాకినాడలో అన్నట్లు వార్తలు వస్తున్నాయి. కాకినాడ శాసనసభ్యుడు ద్వారంపూడి చంద్రశేఖర రెడ్డి జగన్ ముఖ్యమంత్రి కావాల్సిందేనని పట్టుబడుతున్నారు. సిఎల్పీ సమావేశం ఏర్పాటు చేస్తే సత్తా చాటుతామనే పద్ధతిలో ఆయన మాట్లాడుతున్నారు.

కాగా, వరంగల్ జిల్లాకు చెందిన కాంగ్రెసు శాసనసభ్యుడు రాజయ్య కూడా జగన్ ను ముఖ్యమంత్రిని చేయాల్సిందేనని పట్టుబడుతున్నారు. రోశయ్య సిఎల్పీ ఎన్నుకోలేదని, అందువల్ల రోశయ్య తాత్కాలిక ముఖ్యమంత్రేనని కొండా సురేఖ అన్న మాటలకు తాను కట్టుబడి ఉన్నానని ఆయన అన్నారు. జగన్ ను ముఖ్యమంత్రిని చేయకపోతే రాజీనామాలు చేయడానికి కొత్త శాసనసభ్యులతో పాటు సీనియర్ శాసనసభ్యులు కూడా కట్టుబడి ఉన్నారని ఆయన అన్నారు. జగన్ కు మద్దతిస్తూ తాను పార్టీ అధిష్టానానికి ఇచ్చిన లేఖను ఉపసంహరించుకోనని ఆయన చెప్పారు. కాగా, జగన్ ను ముఖ్యమంత్రిని చేయాలని డిమాండ్ చేస్తూ కాంగ్రెసు వారు కడప జిల్లా పరిషత్ సమావేశాన్ని అడ్డుకున్నారు.