తెలియకుండా సంతకం చేశా: శంకర్ రావు

హైదరాబాద్: ముఖ్యమంత్రి వైయస్ రాజశేఖర రెడ్డి మరణం తర్వాత తనతో ఎందుకు సంతకం చేయించుకున్నారో తెలియదని కాంగ్రెసు కంటోన్మెంట్ శాసనసభ్యుడు పి. శంకర్ రావు చెప్పారు. వైయస్ జగన్ ను ముఖ్యమంత్రిగా చేయడానికి మద్దతుగా తాను సంతకం చేస్తున్నట్లు తనకు తెలియదని, ఆ విషయం వారు తనకు చెప్పలేదని ఆయన బుధవారం మీడియా ప్రతినిధుల సమావేశంలో చెప్పారు. తాను దేవుని మీద ప్రమాణం చేసి ఆ విషయం చెబుతున్నానని ఆయన అన్నారు. జగన్ ను ముఖ్యమంత్రిగా బలపరుస్తూ దివంగత నేత వైయస్ రాజశేఖర రెడ్డి అనుచరులు కాంగ్రెసు శాసనసభ్యుల సంతకాలు సేకరించిన విషయం తెలిసిందే.

జగన్ ను ముఖ్యమంత్రిగా చేయాలని చేస్తున్న రగడ మంచిది కాదని శంకర రావు అన్నారు. అది జగన్ కే నష్టం కలిగిస్తుందని ఆయన చెప్పారు. గొడవ చేస్తే దివంగత నేత వైయస్ రాజశేఖర రెడ్డి ఆత్మశాంతికి భంగం వాటిల్లుతుందని ఆయన చెప్పారు. వ్యవహారం పార్టీ అధిష్టానం చేతిలో ఉంది కాబట్టి ఎవరూ మాట్లాడకపోవడం మంచిదని ఆయన అన్నారు. అధిష్ఠానం చేతిలోకి వ్యవహారం వెళ్లిపోయిన తర్వాత తాను ఏమీ మాట్లాడలేదని ఆయన అన్నారు.