ఎమ్మల్యేలకు డి శ్రీనివాస్ హెచ్చరిక

హైదరాబాద్‌: సీఎం అభ్యర్థి విషయంలో ఎవరూ మాట్లాడాల్సిన అవసరంలేదని పీసీసీ అధ్యక్షులు డీ శ్రీనివాస్‌ హెచ్చరించారు. దీనిపై ఎవరూ మాట్లాడినా అధిష్టానం సీరియస్‌గా పరిగణిస్తోందని పేర్కొన్నారు. వైఎస్‌ మృతితో కాంగ్రెస్‌ పార్టీలో క్లిష్ట పరిణామాలు నెలకొన్నాయన్నారు. దీనిని మరింత తీవ్రతరం చేసే ప్రయత్నాలు మానుకోవాలని పార్టీ నేతలకు ఆయన సూచించారు. కొందరు పీసీసీ ఆఫీసు బేరర్లు కూడా శృతిమించి మాట్లాడుతున్నారని తెలిపారు. పార్టీలో క్రమశిక్షణ ముఖ్యమని పేర్కొన్నారు. ఇలాగే వ్యవహరిస్తే వారిపై చర్యలకోసం అధిష్టానానికి నివేదించాల్సి ఉంటుందని ఆయన హెచ్చరించారు. పార్టీలో మరింత గందరగోళం సృష్టించకుండా ప్రతిపక్షాలకు అవకాశం ఇచ్చేలా వ్యవహరించొద్దని సూచించారు.

అలాగే రాజీనామాలు చేస్తామని ఎవరూ మాట్లాడవద్దు. పార్టీ మద్దతుతోనే ప్రతివారూ గెలిచారన్న విషయాన్ని గుర్తుంచుకోవాలి. రాజీనామాలతో పార్టీ బలహీనపడే అవకాశం ఉంది. పార్టీ వాదులెవరూ ఇటువంటి చర్యలతో మంచి వాతావరణాన్ని చెడగొట్టరు. రాష్ట్రంలో ముఖ్యమంత్రి ఉన్నారు. సీఎం అభ్యర్థి విషయంలో ఎవరు మాట్లాడినా అధిష్ఠానం సీరియస్‌గా పరిగణిస్తుంది. కాంగ్రెస్‌ జాతీయ పార్టీ. విధానాలు, నియమాలకు అనుగుణంగా పార్టీలో నిర్ణయాలు తీసుకోవడం జరుగుతుంది. పార్టీలో క్రమశిక్షణ ముఖ్యం. ఎన్ని సమస్యలు ఎదురైనా బహిరంగంగా వ్యాఖ్యానించరాదు. అందుకు నేనే ఉదాహరణ అని ఆయన అన్నారు.