పోటెత్తుతున్న కృష్ణమ్మ తల్లి

హైదరాబాద్: కృష్ణా నదిలో ప్రవాహం పోటెత్తుతోంది. ఆదివారంనాటికి కృష్ణా బ్యారేజీకి పది లక్షల క్యూసెక్కుల నీరు వచ్చి చేరే అవకాశం ఉన్నట్లు అంచనా వేస్తున్నారు. కృష్ణా నది నీటి ప్రవాహ మట్టం పెరగడంతో నల్లగొండ, గుంటూరు, కృష్ణా జిల్లాలోని పలు ప్రాంతాలు దీని తాకిడికి గురవుతున్నాయి. నల్లగొండ జిల్లాలోని మిర్యాలగుడా డివిజన్ లో వాగులు, వంకలు పొంగిపొర్లుతున్నాయి. చందంపేట మండలంలోని రెండు గ్రామాలు నీట మునిగాయి. చండూరులోని వాగులో ఒక వ్యక్తి గల్లంతయ్యాడు. మట్టపల్లిలోని శ్రీలక్ష్మీనరసింహ స్వామి ఆలయం నీట మునిగింది. మేళ్లచెరుపు తదితర పలు మండలాల గ్రామాలు నీటి ముంపునకు గురవుతున్నాయి.

గుంటూరు జిల్లాలోని పలు గ్రామాలు జలదిగ్బంధంలో చిక్కుకున్నాయి. పలు గ్రామాల ప్రజలను అధికారులు సురక్షిత ప్రాంతాలకు తరలిస్తున్నారు. తెనాలి డివిజన్ లోని లంక గ్రామాలకు వరద ముప్పు పొంచి ఉంది. కృష్ణా జిల్లాకు వరద ప్రమాదం తీవ్రంగానే ఉంది. రంగారెడ్డి జిల్లాలోని పలు వాగులు పొంగి పొర్లుతున్నాయి. ప్రాజెక్టులు నిండి వరదలు పోటెత్తుతున్నాియ. తాండూరులోని పలు వాగులు పొంగి పొర్లుతున్నాయి. ఇబ్రాహీం పట్నంలో ఇళ్లు కూలిపోయాయి.