సేవా దృక్పథంతో రండి: చంద్రబాబు నాయుడు

హైదరాబాద్: మానవతా దృక్పథంతో ముందుకు వచ్చి వరద బాధితులను ఆదుకోవాలని తెలుగుదేశం పార్టీ అధ్యక్షుడు నారా చంద్రబాబు నాయుడు ప్రజలను కోరారు. వరద బాధితుల కోసం తెలుగుదేశం పార్టీ వస్తు సేకరణ ప్రారంభించింది. ఈ కార్యక్రమాన్ని చంద్రబాబు సోమవారంనాడు ప్రారంభించారు. కార్యకర్తలు, ఇతరులు చెక్కులు, వస్తు రూపాల్లో విరాళాలు అందించారు. వరద తాకిడి ప్రాంతాల్లో ఎన్టీఆర్ ట్రస్టు ఆధ్వర్యంలో వైద్య శిబిరాలు ఏర్పాటు చేసినట్లు ఆయన తెలిపారు.

అంటువ్యాధులు ప్రబలకుండా ముందస్తు జాగ్రత్తలు చేపట్టాలని ఆయన ప్రభుత్వాన్ని కోరారు. దొంగ తనాల నివారణకు కూడా చర్యలు తీసుకోవాలని ఆయన ప్రభుత్వానికి విజ్ఞప్తి చేశారు. వరద ముంపును జాతీయ విపత్తుగా ప్రకటించాలని, వరద తాకిడి ప్రాంతాల్లో పర్యటించాలని ఆయన ప్రధాని మన్మోహన్ ను కోరారు. అనంతరం ఆయన గుంటూరు, కృష్ణా, నల్లగొండ జిల్లాల్లో ఏరియల్ సర్వే నిర్వహించేందుకు బయలు దేరి వెళ్లారు. ఆదివారంనాడు ఆయన కర్నూలు, మహబూబ్ నగర్ జిల్లాల్లో ఏరియల్ సర్వే నిర్వహించారు.