వరద నష్టం రూ. 12,225 కోట్లు

హైదరాబాద్: రాష్ట్రంలో వరదల వల్ల 12,225 కోట్ల రూపాయల నష్టం వాటిల్లినట్లు రాష్ట్ర ప్రభుత్వం ప్రాథమిక నివేదికను రూపొందించింది. ప్రాథమిక నివేదిక అంచనాలతో కూడిన విజ్ఞప్తి పత్రాన్ని ముఖ్యమంత్రి కె.రోశయ్య సోమవారం ఉదయం యుపిఎ చైర్ పర్సన్ సోనియా గాంధీకి శంషాబాద్ విమానాశ్రయంలో అందించారు. పశు సంపద 270 కోట్ల రూపాయల మేరకు నష్టపోయిందని, మత్స్యసంపద నష్టం రూ. 100 కోట్ల మేరకు ఉంటుందని అంచనా.

ఇళ్లకు జరిగిన నష్టం రూ.300 కోట్లు, వ్యవసాయం, పండ్ల తోటలకు వాటిల్లిన నష్టం 1,005 కోట్ల మేరకు ఉంటుందని ఈ నివేదికలో తెలియజేశారు. రోడ్లు, విద్యుత్, తదితర సౌకర్యాలకు జరిగిన నష్టం కూ. 10,000 కోట్లు ఉంటుందని తెలిపారు. పునరావాసం, ఆహారం సరఫరాకు రూ. 500 కోట్లు అవసరమవుతాయని చెప్పారు. వరద సాయం కోసం తక్షణమే 6 వేల కోట్ల రూపాయలను కేంద్రం విడుదల చేసేలా చూడాలని రోశయ్య సోనియాను కోరారు. వరద ప్రమాదాన్ని జాతీయ విపత్తుగా పరిగణించాలని కోరుతూ రోశయ్య ప్రధాని మన్మోహన్ సింగ్ కు మరో లేఖ రాశారు.