వరద గుప్పిట్లో గుంటూరు, నల్లగొండ

హైదరాబాద్: కృష్ణానది ఉగ్రరూపానికి గుంటూరు జిల్లా కూడా అతలాకుతలమవుతోంది. నల్లగొండ జిల్లా తీర ప్రాంతాలను కూడా పరదలు ముంచెత్తాయి. గుంటూరు జిల్లాలోని అమరావతి పూర్తిగా నీటిలో మునిగింది. బెల్లంకొండ, అచ్చంపేట, మాచవరం మండలాల్లోని గ్రామాలు నీట మునిగాయి. అరవింద వారిధిపై నుంచి నీరు ప్రవహిస్తోంది. రేపల్లే మండంలోని లంకవానిదిబ్బ నీటిలో మునిగింది. జిల్లాలోని ఓ స్లూయిజ్ కాలువకు గండి పడింది. ప్రకాశం బరాజ్ వద్ద నీటి ప్రవాహం మరింత పెరుగుతుండడంతో కృష్ణా జిల్లాకే కాకుండా గుంటూరు జిల్లాకు కూడా పెద్ద యెత్తున ప్రమాదం పొంచి ఉంది. అమరావతి చుట్టుపక్కల గ్రామాల్లోకి కూడా నీరు వచ్చి చేరింది. కరకట్ట పరిస్థితి దారుణంగా ఉంది. దానిపై నుంచి నీరు ప్రవహించే ప్రమాదం ఉంది. లంక గ్రామాల్లో నీరు సోమవారం సాయంత్రానికి మరింత పెరిగే ప్రమాదం ఉంది.

నల్లగొండ జిల్లాలోని ఏడు మండలాల్లోని 32 గ్రామాలు వరద తాకిడికి గురయ్యాయి. పులిచింతల సమీపంలోని మేళ్లచెర్వు మండలంలోని 8 గ్రామాలు నీట మునిగాయి. దాదాపు 24,776 మందిని పునరావాస కేంద్రాలకు తరలించారు. మఠంపల్లి మండలంలోని మట్టపల్లిలో గల శ్రీలక్ష్మీనరసింహ స్వామి దేవాలయం నీట మునిగింది.