జాతీయ విపత్తు: సోనియాతో రోశయ్య

హైదరాబాద్: రాష్ట్రంలో సంభవించిన వరద తాకిడిని జాతీయ విపత్తుగా పరగణించాలని ముఖ్యమంత్రి కె.రోశయ్య యుపిఎ చైర్ పర్సన్ సోనియా గాంధీని కోరారు. వరద తాకిడి ప్రాంతాలను సందర్శించడానికి వచ్చిన సోనియాకు ఆయన హైదరాబాదులోని శంషాబాద్ విమానాశ్రయంలో సోమవారం స్వాగతం చెప్పారు. ఆమెకు వరద సాయం కోసం వినతిపత్రం సమర్పించారు. వరద బాధితుల సాయం కోసం కేంద్రం తక్షణమే 6 వేల కోట్ల రూపాయలు అందించేలా చూడాలని కూడా ఆయన సోనియాకు విజ్ఞప్తి చేశారు.

ముఖ్యమంత్రి కార్యాలయం సి - బ్లాకులోకి ప్రవేశించిన తర్వాత రోశయ్య సోమవారం ఉదయం సోనియా గాంధీకి సమర్పించే వినతిపత్రంపై తొలి సంతకం చేశారు. ఆ తర్వాత ప్రతి కుటుంబానికి 30 కిలోల బియ్యం ఇచ్చేందుకు కేంద్ర సాయం కోరుతూ మరో ఫైల్ పై సంతకం చేశారు. సోనియాతో పాటు వరద తాకిడి ప్రాంతాలకు ముఖ్యమంత్రి రోశయ్య, పిసిసి అధ్యక్షుడు డి. శ్రీనివాస్, కేంద్ర హోం మంత్రి పి. చిదంబరం, కాంగ్రెసు రాష్ట్ర వ్యవహారాల ఇంచార్జీ వీరప్ప మొయిలీ బయలుదేరి వెళ్లారు.