భయం గుప్పిట్లో దివిసీమ, బెజవాడ

విజయవాడ: శ్రీశైలం, నాగార్జున సాగర్ జలాశయాల ప్రవాహ ఉధృతి తగ్గినప్పటికీ విజయవాడ, లంక గ్రామాల ప్రజలు ఇంకా భయం గుప్పిట్లోనే ఉన్నాయి. చాలా ప్రాంతాలకు ముంపు ప్రమాదం పొంచే ఉందని అంటున్నారు. విజయవాడ నగరం వరదలతో విలవిలలాడుతోంది. కృష్ణా జిల్లాలోని లంక గ్రామాల ప్రజలు భయం గుప్పిట్లో చిక్కుకున్నారు. దివిసీమకు పెను ముప్పు పొంచి ఉంది. పులిగడ్డ అక్విడెక్ట్ వద్ద భయానక వాతావరణం నెలకొని ఉంది. కృష్ణా నది ఎడమ కరకట్ట దెబ్బ తినడంతో 160 గ్రామాలకు ముప్పు ఏర్పడింది.

కృష్ణా జిల్లాలోని మూలపాడు 9 నెంబర్ జాతీయ రహదారిపై మూడు అడుగుల మేర నీరు నిలిచి ఉంది. పోయపాడు వద్ద కరకట్టకు గండి పడింది. దీంతో అధికారులు అప్రమత్తమయ్యారు. ప్రకాశం బరాజ్ వద్ద వరద ప్రవాహం రికార్డు స్థాయిలో ఉండడంతో కృష్ణా, గుంటూరు జిల్లాలకు ఇంకా ప్రమాదం పొంచే ఉంది. అవనిగడ్డ, నాగాయలంక, కోడుమూరు మండలాల్లోని గ్రామాలు నీటిలో చిక్కుకున్నాయి. విజయవాడలోని భవానీపురం, విద్యాధర పురం నుంచి 12 వేల మందిని సురక్షిత ప్రాంతాలకు తరలిస్తున్నారు.