బాధితుల్ని అదుకుంటాం: సోనియా

హైదరాబాద్: రాష్ట్రంలోని వరద బాధితులను అన్ని విధాలా ఆదుకుంటామని యుపిఎ చైర్ పర్సన్, కాంగ్రెసు అధ్యక్షురాలు సోనియా గాంధీ హామీ ఇచ్చారు. వరద బాధితులను ఆదుకోవడంలో రాష్ట్రానికి కేంద్రం అన్ని విధాలుగా సహకరిస్తుందని ఆమె చెప్పారు. మహబూబ్ నగర్, కర్నూలు జిల్లాల్లోని వరద తాకిడి ప్రాంతాల్లో ఆమె సోమవారం ఏరియల్ సర్వే నిర్వహించారు. వరద తాకిడి ప్రాంతాల్లో త్వరలోనే సాధారణ పరిస్థితులు నెలకొంటాయని ఆమె మీడియా ప్రతినిధుల వద్ద ఆశాభావం వ్యక్తం చేశారు.

విజయవాడలో మరోసారి వరద పరిస్థితిని అంచనా వేసి అవసరమైన మేరకు ప్రజలను ఖాళీ చేయించాలని ఆమె రాష్ట్ర ప్రభుత్వానికి సూచించారు. వరద ప్రమాదం నుంచి బయటపడేందుకు రాష్ట్రానికి బాసటగా నిలుస్తామని ఆమె హామీ ఇచ్చారు. కరకట్టలను మరోసారి తనిఖీ చేసి బలహీనంగా ఉన్న చోట్ల మరమ్మతులు చేపట్టాలని ఆమె సూచించారు. వరద తాకిడి ప్రాంతాల్లో పర్యటించి తిరిగి హైదరాబాదుకు తిరిగి వచ్చిన తర్వాత ఆమె మీడియా ప్రతినిధులతో మాట్లాడారు. ఆ తర్వాత కర్నాటక రాష్ట్రంలోని బళ్లారికి బయలుదేరి వెళ్లారు.