'విద్యుత్ ప్రాజెక్టులకు ముప్పు లేదు'

హైదరాబాద్: రాష్ట్రంలోని విద్యుదుత్పత్తి కేంద్రాలకు ముప్పు లేదని జెన్కో అధికారులు ముఖ్యమంత్రి కె. రోశయ్యకు తెలిపారు. విద్యుదుత్పత్తి కేంద్రాల స్థితిపై ముఖ్యమంత్రి మంగళవారం జెన్కో ఉన్నతాధికారులతో సమీక్షించారు. విజయవాడ థర్మల్ పవర్ ప్రాజెక్టు (విటిపిఎస్)కు ఏ విధమైన నష్టం లేదని వారు చెప్పారు. విజయవాడ వరద తాకిడికి గురైన నేపథ్యంలో విటిపిఎస్ కు ఏమైనా నష్టం ఉంటుందా అనే విషయంపై రోశయ్య ఆరా తీశారు. నాగార్జునసాగర్, జూరాల జల విద్యుదుత్పత్తి కేంద్రాలకు కూడా ఏ విధమైన నష్టం లేదని జెన్కో అధికారులు చెప్పారు.

శ్రీశైలం ఎడమ గట్టు జల విద్యుదుత్కేంద్రంలో ఉత్పత్తిని వారంలోగా పునరద్ధరిస్తామని అధికారులు చెప్పారు. శ్రీశైలం రిజర్వాయరులో నీటి మట్టం 885 అడుగులకు చేరుకుంటే 900 మెగావాట్ల విద్యుత్తు ఉత్పత్తి అవుతుందని వారు చెప్పారు. ప్రస్తుతం నీటి మట్టం పూర్తిస్థాయి కన్నా ఎక్కువగా 891 అడుగులు ఉంది. కాగా, శ్రీశైలం కుడి గట్టు జల విద్యుత్కేంద్రంలో ఉత్పత్తి పునరుద్ధరణ ఇప్పట్లో సాధ్యం కాదని, అందుకు కనీసం మూడు నెలలైనా పడుతుందని వారు తెలిపారు.