జలదిగ్బంధంలో రేపల్లె పట్టణం

గుంటూరు: గుంటూరు జిల్లా రేపల్లే పట్టణం నీటిలోనే ఉంది. పట్టణంలో నాలుగు అడుగుల మేర నీరుంది. ప్రజలు నిత్యావసర సరుకుల కోసం తీవ్ర ఇబ్బందులు పడుతున్నారు. కృష్ణా నదికి వరద ఉధృతి తగ్గినా జిల్లాలోని పలు మండలాల గ్రామాలు నీట మునిగే ఉన్నాయి. రేపల్లె, కొల్లూరు మండలాల్లో అనేక గ్రామాల్లో వరద నీరు ప్రవహిస్తోంది. రేపల్లే పట్టణంలోని ప్రజలను ఇతర ప్రాంతాలకు తరలించే ప్రయత్నం చేస్తున్నారు. వచ్చే 36 గంటల వరకు నీరు ఉండవచ్చునని భావిస్తున్నారు. రేపల్లె రైల్వే ట్రాక్ పై కూడా నీరు చేరింది. రేపల్లెకు రాకపోకలు స్తంభించాయి. కరకట్టలకు గండి పడి రేపల్లెలోకి నీరు వస్తోంది. మంగళవారం అర్థరాత్రి నుంచి రేపల్లెకు నీరు ప్రవహిస్తోంది. కరకట్ట గండి పూడ్చే ప్రయత్నం చేస్తున్నారు.

రేపల్లె పట్టణం సమీపంలోని కాలువకు గండి పడే ప్రమాదం ుంది. దీంతో ఇసుక బస్తాలతో కరకట్టను మరింత పటిష్టం చేశారు. పెనుమూడి వద్ద రాకపోకలను అధికారులు నిలిపేశారు. కొల్లిపర మండలం వల్లబాఫురం వద్ద మంగళవారం కొట్టుకుపోయిన స్లూయిజ్ గేటుకు పూర్తి స్థాయిలో మరమ్మతలు చేయలేదు. దీంతో అత్తలూరు గ్రామంలో ఇంకా నీరు ఉంది.