త్వరలో రోశయ్య కేబినెట్ లో మార్పులు

హైదరాబాద్: ముఖ్యమంత్రి కె.రోశయ్య త్వరలో తన మంత్రివర్గాన్ని పునర్వ్యస్థీకకరించనున్నట్లు వార్తలు వస్తున్నాయి. అయితే మంత్రి వర్గంలో మార్పులు చేర్పులు ఎప్పుడు ఉంటాయనేది కచ్చితంగా చెప్పలేకపోతున్నారు. ఆయన ఢిల్లీ వెళ్లి వచ్చిన తర్వాత అందుకు శ్రీకారం చుట్టే అవకాశాలున్నాయి. అయితే ఇప్పుడిప్పుడే ఢిల్లీ వెళ్లే అవకాశాలు లేవు. మహారాష్ట్రతో పాటు మూడు రాష్ట్రాల శాసనసభ స్థానాలకు జరుగుతున్న ఎన్నికలు పూర్తయిన తర్వాత రోశయ్య ఢిల్లీ వెళ్లే అవకాశాలున్నట్లు చెబుతున్నారు. ఆయన తన మంత్రివర్గంలో భారీగా మార్పులు చేసే అవకాశాలున్నట్లు చెబుతున్నారు.

దివంగత ముఖ్యమంత్రి డాక్టర్ వైయస్ రాజశేఖఱ రెడ్డి పక్కన పెట్టి సీనియర్లకు ఆయన మంత్రివర్గంలో అవకాశాలు కల్పిస్తారని వార్తలు వస్తున్నాయి. ముఖ్యంగా కె.జానారెడ్డి, జెసి దివాకర్ రెడ్డి పేర్లు ప్రముఖంగా వినిపిస్తున్నాయి. డిఎల్ రవీంద్రారెడ్డి, పి.శంకరరావు, ఆదాల ప్రభాకర్ రెడ్డి, కిరణ్ కుమార్ రెడ్డిలకు రోశయ్య తన మంత్రివర్గంలో చోటు కల్పిస్తారని వార్తలు వస్తున్నాయి. కొండా సురేఖ, పిల్లి సుభాష్ చంద్రబోస్, ఆనం రాంనారాయణ రెడ్డిలను మంత్రి వర్గం నుంచి తప్పించే అవకాశాలున్నాయని ప్రచారం జరుగుతోంది. మర్రి శశిధర్ రెడ్డికి శాసనసభ స్పీకర్ పదవి ఇవ్వవచ్చుననే ప్రచారం జరుగుతోంది.

కొండా సురేఖ ఇటీవల రోశయ్యపై తీవ్ర వ్యాఖ్యలు చేశారు. రోశయ్య పూర్తి కాలం ముఖ్యమంత్రి కారని ఆమె విరుచుకుపడ్డారు. వైయస్ జగన్ ను ముఖ్యమంత్రిని చేయాల్సిందేనని ఆమె అన్నారు. అలాగే ఆనం రామనారాయణ రెడ్డి సోదరుడు ఆనం వివేకానంద రెడ్డి కూడా రోశయ్యపై తీవ్ర వ్యాఖ్యలు చేస్తూ జగన్ కు పూర్తి విధేయతను ప్రకటించారు. సీనియర్లతో కూడిన తనదైన మంత్రివర్గాన్ని ఏర్పాటు చేసుకోవడానికి పార్టీ అధిష్టానం రోశయ్యకు అవకాశం కల్పిస్తుందని చెబుతున్నారు. మొదటి నుంచి మర్రి శశిధర్ రెడ్డిని వైయస్ రాజశేఖర రెడ్డి దూరం పెడుతూ వచ్చారు.