షిండే కూతురుకు మోహన్ బాబు ప్రచారం

హైదరాబాద్: మహారాష్ట్ర శాసనసభ ఎన్నికల ప్రచారంలో ప్రముఖ తెలుగు సినీ నటుడు మోహన్ బాబు పాల్గొన్నారు. కేంద్ర మంత్రి సుశీల్ కుమార్ షిండే కూతురు ప్రణీతకు మద్దతుగా ఆదివారం ఆయన షోలాపూర్ లో ప్రచారం చేశారు. ఎన్నికల ర్యాలీలో షిండేతో పాటు ఆయన పాల్గొన్నారు. షోలాపూర్ లో తెలుగువారి ఓట్లు ఉండడంతో మోహన్ బాబును కాంగ్రెసు అభ్యర్థి ప్రణీత తరఫున ఆయన ప్రచారంలో పాల్గొన్నారు.

తనకు షిండేతో 18 ఏళ్ల అనుబంధం ఉందని, ఆ సాన్నిహిత్యంతోనే షిండే కూతురి కోసం ప్రచారం చేశానని ఆయన ఒక ప్రముఖ తెలుగు దినపత్రికతో అన్నారు. తాను ఏ రాజకీయ పార్టీకి కూడా చెందినవాడిని కానని ఆయన చెప్పుకున్నారు. తాను 1999లో తెలుగుదేశం తరఫున రాజ్యసభ సభ్యుడిగా ఉన్నా కూడా షిండే తరఫున ప్రచారం చేసినట్లు ఆయన తెలిపారు. రాజకీయాల నుంచి తాను ఏమీ ఆశించడం లేదని చెప్పారు.