ఇక సినిమాల్లో నటించను: చిరంజీవి

హైదరాబాద్: తాను సినిమాల్లో నటించబోనని ప్రజారాజ్యం అధినేత చిరంజీవి స్పష్టం చేశారు. ఒక ప్రైవేట్ టీవీ చానెల్ కు ఇచ్చిన ఇంటర్వ్యూలో ఆయన ఈ విషయం చెప్పారు. సినిమాల్లో నటించడాన్ని తాను ఊహించుకోలేకపోతున్నానని ఆయన అన్నారు. మంచి సినిమా చేయాల్సి ఉండిందని, తనకు నచ్చిన కథతో ఆ సినిమాకు రూపకల్పన చేశారని, అయినా దాన్ని వదిలేశానని, తిరిగి తాను సినిమాల్లో నటిస్తానని అనుకోవడం లేదని ఆయన అన్నారు. పార్టీ బలోపేతం చేయాల్సిన అవసరం ఉందని, పార్టీ పటిష్టతపైనే తాను పూర్తిగా వెచ్చిస్తానని ఆయన చెప్పారు.

వరద సహాయక చర్యల్లో ప్రభుత్వ వైఫల్యం స్పష్టంగా కనిపించిందని, యంత్రాంగం పని చేయలేదని ఆయన అన్నారు. ముఖ్యమంత్రి రోశయ్య అధికార యంత్రాంగాన్ని ప్రక్షాళన చేస్తే పనులు జరుగుతాయని ఆయన అన్నారు. రోశయ్య అధికార యంత్రాంగం ప్రక్షాళనకు పూనుకున్నారని, ఇక ప్రభుత్వం సమర్థంగానే పని చేయవచ్చునని ఆయన అన్నారు. పూర్తి కాలం ముఖ్యమంత్రిగా కొనసాగుతారని సంకేతాలు వచ్చిన తర్వాత రోశయ్య ఈ ప్రక్షాళనకు పూనుకున్నారని ఆయన అన్నారు. తమ పార్టీ శాసనసభ్యులు వరద సహాయక చర్యల్లో పాల్గొంటున్నారని ఆయన చెప్పారు.