త్వరలో తెలంగాణ టీవీ చానల్: కెసీఅర్

హైదరాబాద్: తాను చిటికె వేస్తే కోట్లాది రూపాయలు ఇచ్చే అభిమానులు ఉన్నారని, వారి అండతో త్వరలో తెలంగాణ టీవీ చానల్ పెడతానని టీఅర్ ఎస్ అధ్యక్షుడు కె చంద్రశేఖరరావు చెప్పారు. టీవీ9 కు ఇచ్చిన ఇంటర్వ్యూలో ఆయన అనేక ఆసక్తికరమైన విషయాలను వెల్లడించారు. తమ టీవీ చానల్ కోసం టీవీ9 రవి ప్రకాష్ సలహాలు తీసుకుంటానని ఆయన చెప్పారు.

రాజకీయ అవినీతికి పాల్పడవలసిన అవసరం తనకు లేదని, కొన్ని వందల ఎకరాలున్న భూస్వామ్య కుటుంబంలో తాను పుట్టానని కెసీఅర్ వ్యాఖ్యానించారు. ఐదెకరాల విస్తీర్ణం గల స్ధలంలో మూడంతస్ధుల బంగళాలో పుట్టి పెరిగానని ఆయన చెప్పారు. కొన్ని డజన్ల మందిని తాను ఎమ్మెల్యేలను చేశానని, నలుగురైదుగురిని ఎంపీలుగా గెలిపించి పంపానని ఆయన అన్నారు. తాను ఒక సామాన్య నాయకుడినీ కాదని, తనొక క్రియేటర్ నని, క్రూసేడర్ నని ఆయన చెప్పుకున్నారు. ఎంపీగా తన ఒక నెల జీతమైన 60 వేల రూపాయలను టీవీ9 వరద సహాయ నిధికి ఆయన అందజేశారు.