జగన్ అనుభవం గుర్తు రాలేదా: అంబటి

హైదరాబాద్: కడప పార్లమెంటు సభ్యుడు వైయస్ జగన్ ను ముఖ్యమంత్రి చేయాలనే డిమాండ్ ను వ్యతిరేకిస్తున్న అమలాపురం పార్టీ పార్లమెంటు సభ్యుడు హర్షకుమార్ పై కాంగ్రెసు అధికార ప్రతినిధి అంబటి రాంబాబు తీవ్రంగా మండిపడ్డారు. జగన్ ను ముఖ్యమంత్రిని చేయాలని మొదట డిమాండ్ చేసిన వ్యక్తి హర్షకుమారేనని, ఆ రోజు జగన్ అనుభవం హర్షకుమార్ కు రాలేదా అని ఆయన శనివారం మీడియా ప్రతినిధులతో అన్నారు. ముఖ్యమంత్రి పదవి చేపట్టేందుకు జగన్ కు అనుభవం లేదని హర్షకుమార్ చేసిన వ్యాఖ్యలపై ఆయన ఆ విధంగా అన్నారు. జగన్ కు అనుకూలంగా సంతకాల సేకరణ జరిపింది కూడా హర్షకుమారేనని ఆయన అన్నారు.

హస్తం గుర్తు ఉన్నప్పటికీ హర్షకుమార్ రాజమండ్రి మేయర్ ఎన్నికల్లోనూ, పాయకరావు పేట శాసనసభ ఎన్నికలోనూ హర్షకుమార్ ఓడిపోయారని, ఆ విషయాన్ని హర్షకుమార్ గుర్తు చేసుకోవాలని ఆయన అన్నారు. తాము వైయస్ చరిష్మాతో గెలవలేదని, చేతి గుర్తుతోనే గెలిచామని హర్షకుమార్ చేసిన ప్రకటనకు ఆయన ఆ విధంగా అన్నారు. జగన్ పై అనుచిత వ్యాఖ్యలు చేస్తున్న హర్షకుమార్ ను దళితులు క్షమించబోరని ఎస్సీ, ఎస్టీ కమిషన్ మాజీ చైర్మన్ నాగార్జున అన్నారు.