ఇందూవర్ హత్యలో రవిశర్మ పాత్ర?

రాంచీ: జార్ఖండ్ ఇన్ స్పెక్టర్ ఫ్రాన్సిస్ హత్య సంఘటనలో అరెస్టయిన మావోయిస్టు నేత రవిశర్మ పాత్ర ఉన్నట్లు జార్ఖండ్ పోలీసులు అనుమానిస్తున్నారు. అతని వద్ద ఇందూవర్ కిడ్నాప్, హత్యలకు సంబంధించిన వీడియోలు, వార్తా పత్రిక క్లిప్పింగులు ఉండడంతో పోలీసులు ఆ విధంగా అనుమానిస్తున్నారు. మావోయిస్టు దంపతులు రవిశర్మ (49), బి. అనురాధ (45)లను జార్ఖండ్ పోలీసులు బుధవారం అరెస్టు చేసిన విషయం తెలిసిందే. వారి నుంచి పోలీసులు ల్యాప్ టాప్, సిడిలు, ఇతర సామగ్రిని స్వాధీనం చేసుకున్నారు. వారిద్దరిని పోలీసులు శుక్రవారం తమ కస్టడిలోకి తీసుకున్నారు.

ల్యాప్ టాప్, సిడిల్లో ఇందూవర్ కిడ్నాప్, హత్యలపై టీవీ చానెళ్లు ప్రసారం చేసిన దృశ్యాలు ఉన్నాయి. జాతీయ, స్థానిక పత్రికల్లో వచ్చిన వార్తలను స్కాన్ చేసిన క్లిప్పింగ్ లున్నాయని హజారీబాగ్ పోలీసు సూపరింటిండెంట్ పంకజ్ కాంబోజ్ చెప్పారు. దీన్ని బట్టి ఇందూవర్ హత్యతో రవిశర్మకు సంబంధం ఉండి ఉంటుందని అనుమానిస్తున్నట్లు పోలీసులు తెలిపారు. మావోయిస్టు పార్టీ ఏడాదికి 25 కోట్ల రూపాయల డబ్బులు సేకరిస్తుందని రవిశర్మ అంగీకరించినట్లు పోలీసులు తెలిపారు.