ఆస్ట్రేలియాలో ముగ్గురు భారతీయులపై దాడి

మెల్బోర్న్: ఆస్ట్రేలియాలో భారత విద్యార్థులపై దాడులు కొనసాగుతూనే ఉన్నాయి. తాజాగా ముగ్గురు భారత విద్యార్థులపై ఆస్ట్రేలియాలో దాడి జరిగింది. రాత్రి పూట వారు ఇంటికి వెళ్తుండగా ఈ దాడి జరిగింది. మెల్బోర్న్ రైల్వే స్టేషన్ పరిసరాల్లో భారత విద్యార్థులపై దాడులు జరుగుతూనే ఉన్నాయని, గురువారం రాత్రి ముగ్గురు భారత విద్యార్థులపై దుండగులు దాడి చేసి వారిని దోచుకున్నారని ది ఏజ్ పత్రిక శనివారం రాసింది.

దెర్బీ రోడ్ రిజర్వ్ సమీపంలో అండర్స్ రోడ్ లో నడుస్తుండగా నలుగురి నుంచి ఆరుగురు వ్యక్తులు వెనక నుంచి వచ్చి, భారత విద్యార్థులతో ఘర్షణ పడ్డారని, వారి వాలెట్లను, ఫోన్లను డిమాండ్ చేస్తూ ఈ ఘర్షణకు దిగారని పోలీసులు చెప్పారు. బాధితుల్లో ఒక విద్యార్థి రెండు మొబైల్ ఫోన్లు వారికి ఇచ్చేసి పారిపోయాడని వారు చెప్పారు. మిగతా ఇద్దరిని దుండగులు కొట్టారని వారన్నారు.