బోడోల చెరలో ఆంధ్ర ఇంజినీర్ పొలగాని రామకృష్ణారావు

హైదరాబాద్: ఆంధ్రప్రదేశ్ కు చెందిన ఇంజినీర్ పొలగాని రామకృష్ణారావు (45)ను అసోంలో బోడోలు కిడ్నాప్ చేశారు. ఆయన గురించి రాష్ట్ర ప్రభుత్వం అసోం ప్రభుత్వంతో మాట్లాడింది. రాష్ట్ర ముఖ్యమంత్రి కె. రోశయ్య అసోం ముఖ్యమంత్రి తరుణ్ గోగోయ్ తో మాట్లాడారు. రామకృష్ణారావు స్వస్థలం కృష్ణా జిల్లా గుడివాడ. ఆయన కుటుంబ సభ్యులు అదే జిల్లాలోని గన్నవరంలో ఉంటున్నారు. ఆయనకు భార్య, ఇద్దరు పిల్లలున్నారు. గాయత్రీ కన్ స్ట్రక్షన్స్ అనుబంధ సంస్థ ఈస్ట్ కోస్ట్ ఇన్సులేషన్ కంపెనీలో ఆయన వర్కింగ్ ప్రాజెక్టు మేనేజర్ గా పని చేస్తున్నారు. అసోంలోని క్రాగ్రాజార్ జిల్లా జోయ్ పూర్ గ్రామంలో ఆయన ఎన్ హెచ్ - 31 నిర్మాణ పనులను ఆయన పర్యవేక్షిస్తున్నారు. ఆ పనుల్లో ఉండగానే ఆయనను బోడో తీవ్రవాదులు కిడ్నాప్ చేశారు.

కృష్ణారావు గత శుక్రవారం నుంచి కనిపించడం లేదు. కృష్ణారావు వినాయక చవితికి గన్నవరం వచ్చి వెళ్లారు. ప్రతి రోజూ ఇంటికి ఫోన్ చేసి మాట్లాడుతుంటారు. గురువారం ఫోన్ లో భార్యతో మాట్లాడారు. శుక్రవారం నుంచి ఆయన ఫోన్ స్విచ్ఛాఫ్ చేసినట్లుగా సమాచారం వస్తోంది. ఈలోగా ఆయనను తీవ్రవాదులు కిడ్నాప్ చేసినట్లు వెలుగులోకి వచ్చింది. కృష్ణారావు కుటుంబ సభ్యులను మాజీ కేంద్ర మంత్రి దాసరి నారాయణ రావు పరామర్శించారు.