కొండా సురేఖకు శంకరరావు సవాల్

హైదరాబాద్: మహిళా శిశు సంక్షేమ మంత్రి కొండా సురేఖకు కాంగ్రెసు సీనియర్ శాసనసభ్యుడు పి. శంకరరావు సవాల్ విసిరారు. తాను తన శాసనసభ సభ్యత్వానికి రాజీనామా చేసి తిరిగి పోటీ చేయడానికి సిద్ధంగా ఉన్నానని, కొండా సురేఖ కూడా రాజీనామా చేసి తిరిగి పోటీకి సిద్ధపడాలని ఆయన అన్నారు. హస్తం గుర్తుపైనే తాము గెలిచామని, వైయస్ రాజశేఖర రెడ్డి వల్ల గెలవలేదని శంకరరావు చేసిన వ్యాఖ్యపై కొండా సురేఖ మండిపడ్డారు. దానిపై శంకరరావు సోమవారం మీడియా ప్రతినిధుల సమావేశంలో తీవ్రంగా ప్రతిస్పందించారు. తాను హస్తం గుర్తు మీద తిరిగి పోటీ చేస్తానని అంటూ కొండా సురేఖ ఏ గుర్తు మీద పోటీ చేస్తారో చెప్పాలని ఆయన ప్రశ్నించారు.

ముఖ్యమంత్రి పదవి విషయంలో తాను పార్టీ అధిష్టానం నిర్ణయానికి కట్టుబడి ఉంటానని ఆయన అన్నారు. వైయస్ జగన్ ను ముఖ్యమంత్రిగా అధిష్టానం నిర్ణయిస్తే తాను అంగీకరిస్తానని, అప్పుడు జగన్ ను తాను బలపరుస్తానని ఆయన అన్నారు. తాను ఇందిరమ్మ బొమ్మ పెట్టుకుని గెలిచానని, దివంగత నేత వైయస్ రాజశేఖర రెడ్డి కూడా ఇందిరమ్మ రాజ్యం తెస్తానని చెప్పే విజయం సాధించారని ఆయన అన్నారు.