జగన్ ఫోబియా లేదు: రోశయ్య

హైదరాబాద్: తనకు వైయస్ జగన్ ఫోబియా లేదని ముఖ్యమంత్రి కె. రోశయ్య స్పష్టం చేశారు. రాష్ట్రంలో మధ్యంతర ఎన్నికలు వచ్చే అవకాశం గానీ కాంగ్రెసు పార్టీ చీలిపోతుందన్న భయం గానీ లేవని ఆయన అన్నారు. ఆదివారం వివిధ టీవీ చానెళ్లకు ఆయన ఇచ్చిన ఇంటర్వ్యూ వివరాలతో ముఖ్యమంత్రి కార్యాలయం ఒక ప్రకటన విడుదల చేసింది. మంత్రివర్గ విస్తరణ గురించి ఆలోచించడం లేదని ఆయన స్పష్టం చేశారు. వరదలకు మానవ తప్పిదమే కారణమని వచ్చిన విమర్శలను ఆయన తోసిపుచ్చారు.

అధిష్టానం అడిగితే జగన్ విషయంలో చెప్పాల్సిందే చెబుతానని, తాను జగన్ కు అడ్డు కానని ఆయన అన్నారు. పార్టీకి అనుభవంతో పాటు యువరక్తం, సమర్థ నాయకత్వం కూడా అవసరమేనని ఆయన అన్నారు. అధిష్టానం ఏ రోజు నిర్ణయిస్తే ఆ రోజు ముఖ్యమంత్రి పదవి నుంచి తప్పుకుంటానని, పెద్ద మనిషిగా కొత్త ముఖ్యమంత్రిని ఆశీర్వదిస్తానని ఆయన చెప్పారు. మనిషిగా ఎంత కాలం బతకగలమని అనుకుంటామో ముఖ్యమంత్రి పదవి కూడా అంతే కాలమని ఆయన అన్నారు.

మంత్రుల తొలగింపు, మంత్రి వర్గ విస్తరణ, మంత్రుల చేరిక వంటి విషయాలను అధిష్టానమే చూసుకుంటుందని ఆయన అన్నారు.