ఇస్లామాబాద్ వర్సిటీలో బాంబు పేలుళ్లు

ఇస్లామాబాద్: పాకిస్తాన్ రాజధాని ఇస్లామాబాద్ లోని అంతర్జాతీయ విశ్వవిద్యాలయంలో మంగళవారం భవనంలో బాంబు పేలుడు సంభవించింది. ఈ విషయాన్ని పోలీసులు చెప్పారు. బాంబు పేలుడు సంభవించిందని, ఇస్లామిక్ విశ్వవిద్యాలయం భవంతిలో అది జరిగిందని పోలీసు అధికారి మొహమ్మద్ అఫ్జల్ చెప్పారు. రెండు చోట్ల పేలుళ్లు సంభవించినట్లు సమాచారం. ఈ పేలుళ్లలో నలుగురు మరణించినట్లు, 18 మంది గాయపడినట్లు వార్తలు వస్తున్నాయి. అయితే మృతుల సంఖ్య ఇంకా ఎక్కువగా ఉండవచ్చునని అనుమానిస్తున్నారు.

ఈ విశ్వవిద్యాలయంలో ప్రపంచమంతటినీ వచ్చిన విద్యార్థులు చదువుకుంటారు. ఎక్కువ మంది ఇస్లామిక్ స్టడీస్ లో చేరుతారు. గత రెండు వారాలుగా తాలిబన్ల దాడులతో పాకిస్తాన్ అట్టుడికిపోతోంది. దక్షిణ వజీరస్తాన్ లో పాకిస్తాన్ సైన్యం మిలిటెంట్లపై దాడులు జరుపుతున్న నేపథ్యంలో పాకిస్తాన్ లో మిలిటెంట్లు దాడులకు తెగబడుతున్నారు.