నల్లపరెడ్డి ప్రసన్నకుమార్ రెడ్డి ఘెరావ్

నెల్లూరు: పార్టీ అసమ్మతి శాసనసభ్యుడు నల్లపరెడ్డి ప్రసన్నకుమార్ రెడ్డిని నెల్లూరు జిల్లా కొవ్వూరులో తెలుగుదేశం పార్టీ కార్యకర్తలు ఘెరావ్ చేశారు. శాసనసభా సభ్యత్వానికి రాజీనామా చేయాలని డిమాండ్ చేస్తూ పార్టీ కార్యకర్తలు మంగళవారం భారీ ర్యాలీ నిర్వహించారు. సంక్షేమ పథకాల కోసం వచ్చిన ప్రసన్నకుమార్ రెడ్డిని వారు అడ్డుకునే ప్రయత్నం చేశారు. దీంతో పోలీసులు కొంత మందిని అదుపులోకి తీసుకున్నారు. ఇరు వర్గాల మధ్య తోపులాట జరిగింది.

కిరాయి ఆందోళనలకు, రాజకీయ బెదిరింపులకు తాను భయపడేది లేదని ప్రసన్నకుమార్ రెడ్డి అన్నారు. కేరాఫ్ అడ్రస్ లేనివారి డిమాండ్లకు తాను సమాధానం చెప్పాల్సిన అవసరం లేదని ఆయన అన్నారు. తనను గెలిపించిన ప్రజలకే తాను జవాబుదారీనని ఆయన చెప్పారు. నల్లపరెడ్డి ప్రసన్నకుమార్ రెడ్డి గత కొంత కాలంగా తెలుగుదేశం అధ్యక్షుడు నారా చంద్రబాబు నాయుడిపై తీవ్ర విమర్శలు చేస్తున్న విషయం తెలిసిందే.