జగన్ కోరుకోవడంలో తప్పు లేదు: రోశయ్య

హైదరాబాద్: కడప పార్లమెంటు సభ్యుడు వైయస్ జగన్ ఉత్సాహవంతుడని, జగన్ ముఖ్యమంత్రి పదవిని కోరుకుంటే తానేమీ తప్పుగా భావించడం లేదని ముఖ్యమంత్రి కె.రోశయ్య అన్నారు. జగన్ ముఖ్యమంత్రి కావాలని మంత్రులు, పార్టీ శాసనసభ్యులు కోరుకోవడాన్ని కూడా తాను తప్పు పట్టడం లేదని ఆయన అన్నారు. ఆయన మంగళవారం మీట్ ది ప్రెస్ కార్యక్రమంలో మాట్లాడారు. తాను ముఖ్యమంత్రి పదవికి రేసులో లేనని, పరుగు పందెంలో ఉండడం కూడా తన తత్వానికి పడని విషయమని ఆయన అన్నారు. పార్టీ అధిష్టానం నిర్ణయం తల వంచి నిర్వహిస్తున్నానని ఆయన అన్నారు. వైయస్ రాజశేఖర రెడ్డి పోవడం ఒక విపత్తయితే, వరదలు రావడం మరో విపత్తని ఆయన అన్నారు. వరద సహాయక చర్యలు అధికారులు బాగా చేపట్టారని, ఆరోపణలు వస్తున్నా అధికారులు బాగా చేశారనే విషయాన్ని తాను చెప్పగలనని ఆయన అన్నారు.

తనకు వ్యక్తిగతంగా ఎవరి మీదా శత్రుత్వం లేదని, విధానపరంగా విభేదాలు మాత్రమే ఉంటాయని నమ్ముతానని, ఏ ఒక్క పార్టీ మీదా తనకు శత్రుత్వం లేదని, తాను విరోధినని ఎవరైనా అనుకుంటే తానేమీ చేయలేనని, వ్యక్తిగతంగా శత్రుత్వం పెంచుకుంటే సరైంది కాదని ఆయన అన్నారు. వరద బాధితులకు అందించాల్సిన సహాయాన్ని కొంత మంది స్వాహా చేస్తున్నారనే ఆరోపణలను మీడియా ప్రతినిధులు ప్రస్తావించగా నిర్దిష్టంగా వివరాలు ఇస్తే చర్యలు తీసుకుంటామని, దళారులు, దోపిడీదారుల చేతుల్లోకి వెళ్లకుండా చూడాలనేది తమ ఉద్దేశమని ఆయన చెప్పారు.