హర్యానాలో ఊపందుకున్న బేరసారాలు

న్యూఢిల్లీ: హర్యానా శాసనసభ ఎన్నికల్లో ఏ పార్టీకి కూడా స్పష్టమైన మెజారిటీ రాకపోవడంతో బేరాసారాలు ఊపందుకున్నాయి. హర్యానా శాసనసభలో మొత్తం 90 స్థానాలుండగా ప్రభుత్వం ఏర్పాటుకు కనీసం 46 స్థానాలు కావాల్సి ఉంటుంది. కాంగ్రెసుకు 40 స్థానాలు రాగా, చౌతాలా నాయకత్వంలోని ఐఎన్ఎల్డీ 32 స్థానాలు సాధించింది. భజన్ లాల్ కుమారుడి నాయకత్వంలోని హర్యానా జనహిత్ కాంగ్రెసు (హెచ్జెసి)కి ఆరు స్థానాలు వచ్చాయి. బిజెపి నాలుగు స్థానాల్లో మాత్రమే విజయం సాధించింది. బిఎస్పీ ఒక్క స్థానాన్ని గెలుచుకుంది. అధికారాన్ని తిరిగి నిలబెట్టుకోవడానికి కాంగ్రెసు ప్రయత్నాలు సాగిస్తోంది. హెచ్ జేసిని తన వైపు తిప్పుకునేందుకు కాంగ్రెసు పార్టీ ప్రయత్నాలు మొదలు పెట్టింది. ఇతరులు ఏడుగురు గెలిచారు.

బిజెపి కలిసినా చౌతాలా ప్రభుత్వాన్ని ఏర్పాటు చేసే పరిస్థితిలో లేదు. అయినా ప్రభుత్వ ఏర్పాటుకు చౌతాలా ఉవ్విళ్లూరుతున్న సూచనలు కనిపిస్తున్నాయి. ప్రభుత్వ ఏర్పాటుకు కాంగ్రెసును ఆహ్వానించవద్దని ఆయన గవర్నర్ ను డిమాండ్ చేశారు. ప్రతిపక్షాలకు కాంగ్రెసు కన్నా ఎక్కువ సీట్లు వచ్చాయని ఆయన వాదిస్తున్నారు. నైతికంగా కాంగ్రెసు ప్రభుత్వ ఏర్పాటుకు ముందుకు రాకూడదనేది ఆయన అభిప్రాయం.

చౌతాల ఉచన కలాన్ నియోజకవర్గం నుంచి విజయం సాధించారు. హర్యానా ముఖ్యమంత్రి భూపిందర్ సింగ్ హుడా 12,100 ఓట్ల మెజారిటీతో విజయం సాధించారు. చౌతాలా కుమారుడు అజయ్ సింగ్ చౌతాలా దబ్వాలీ నియోజక వర్గంలో విజయం సాధించారు. ముఖ్యమంత్రి పదవి కోసం నాయకుడిని కాంగ్రెసు పార్టీ అధిష్టానం నిర్ణయిస్తుందని హుడా చెప్పారు. క్రమశిక్షణ గల పార్టీ కార్యకర్తగా తాను కాంగ్రెసు అధిష్టానం నిర్ణయానికి కట్టుబడి ఉంటానని ఆయన చెప్పారు.